Коррекциялық педагогика пәні және оның міндеттері

Тұрғынбаева Б.Ш. Коррекциялық педагогика

Коррекциялық педагогика пәні және оның міндеттері

1.1 Оқыту мәселесіндегі коррекциялық педагогиканың тұжырымдамалық негіздері мен тарихы.

1.2 В.П. Кащенко – коррекциялық педагогиканың негізін салушы.

1.3 Бала дамуындағы бұзылудың түрлері және ауытқушылықтарды түзету, тексеру жұмыстарының қағидалары мен әдістері.

1.4 Психикалық дамуы тежелген, тірек-қимыл аппараты және есту қабілеті бұзылған балаларды түзете отырып жүргізілетін дамыту жұмыстарының ерекшеліктері.

1.1 Оқыту мәселесіндегі коррекциялық педагогиканың тұжырымдамалық негіздері мен тарихы

Коррекциялық педагогика – психофизикалық дамуында түрлі ауытқушылықтары бар балаларды оқыту және тәрбиелеу мәселесімен айналысатын педагогиканың арнайы бір саласы. Сонда, коррекциялық педагогика мінез-құлқында, психикалық дамуында ауытқушылығы бар балаларды тәрбиелеу және оларға психологиялық-педагогикалық тұрғыдан білім беру мен оқыту заңдылықтарын қарастырады. Ауытқушылығы бар балалар категориясына оқу бағдарламаларын жалпыға бірдей талаппен меңгеруі күрделі мәселе болатын балалар жатады. Бұған олардың ақыл-ойында (интеллектісінде), естуінде, көру қабілетінде және жүріп-тұруында биологиялық, әлеуметтік түрлі себептерге байланысты кейбір кемістіктер, бұзылулар мүмкіндік бермейді. Бұл категорияға кейбір балалардың орталық жүйке жүйесінің қызметінде шамалы ғана ауытқушылығы бар болса да, сондай-ақ, кейбірінің мектепке және әлеуметтік ортаға бейімделу мүмкіндігі төмен болса да жатады. Сондықтан, осындай категориядағы балаларды дамыту, тәрбиелеу, оқыту барынша жекелендіруді, саралауды қажет етеді. Сонымен қатар, дер кезінде балалардың мінез-құлқындағы және дамуындағы бұзылуларды анықтайтын, алдын алатын және осы бұзылуларды түзетіп, қалыпты жағдайға жеткізетін тиімділігі жоғары арнайы педагогикалық-психологиялық әдіс-тәсілдер мен құралдарды ойластырып, түзетуші педагогикалық іс-әрекетті жүзеге асыру керек.

Коррекциялық педагогиканың пәні тәрбиеленушілердің (мүмкіндігі шектеулі және девиантты мінез-құлық танытатын балалардың) білім алуына қатысты ата-аналар мен педагогтардың мақсат-бағдарлы түзетуші, дамытушы педагогикалық іс-әрекеттері болып табылады.

Коррекциялық педагогиканың төмендегідей атқаратын міндеттері бар:

∙ Балалар мен жасөспірімдердің дамуындағы кемшіліктерді, мінез-құлықтарындағы түрлі ауытқушылықтарды, сондай-ақ, олардың пайда болу себептері мен шарттарын анықтау.

∙ Коррекциялық педагогикалық іс-әрекет ықпалын үздіксіз бақылауда ұстау.

∙ Балалар мен жасөспірімдердің мінез-құлқында, дамуында көрінетін ауытқушылықтар мен бұзылуларды түзетуге және алдын-алуға арналған бағдарламалар жасау.

∙ Баланың психофизикалық дамуына әсер ететін әлеуметтік педагогикалық факторларды айқындау.

∙ Ауытқуы бар баланың тұлғалық дамуына коррекциялық-педагогикалық ықпалы пәрменді болатын түрлі әдіс-тәсілдер мен құралдар жасау.

∙ Ауытқуы бар балаларды оқытып, тәрбиелейтін педагогтарға арнайы коррекциялық- педагогикалық жұмыс бойынша оқыту әдістемесін құру.

∙ Балалардың психикалық, психосоматикалық, психологиялық жағдайларына жүйелі бақылау жүргізіп отыру.

∙ Балалардың жеке тұлғасын және мінез-құлқын зерттеуге арналған арнайы әдістемелердің кешенін құру.

∙ Балалардың мінез-құлқындағы, жүріс-тұрысындағы тұйық, «қиын», агрессивті болудың себептерін анықтап, олардың ішкі жан-дүниесін түсініп, қабылдай алу.

∙ Психикалық, психологиялық ауытқушылық бойынша баланың алғашқы жағдайы мен оған коррекциялық педагогикалық жұмыс жүргізгеннен кейінгі нәтижені салыстырып, қорытынды жасау.