Цифрлык бiлiм беру - биологияны окытудын заманауи кiлтi

ЦИФРЛЫҚ БІЛІМ БЕРУ - БИОЛОГИЯНЫ ОҚЫТУДЫҢ ЗАМАНАУИ КІЛТІ

Багимбаева Зухра Болатбековна

«Сәрсен Аманжолов атындағы

Шығыс Қазақстан Университеті» КЕ АҚ

Өскемен, Қазақстан

Аннотация: Бұл мақалада цифрлық технологиялардың қарқынды дамуы және олардың білім беру жүйесіне әсері, сонымен қатар биологияны оқытуда цифрлық технологияларды қолдану арқылы болашақ биолог педагогтарының цифрлық құзыреттілігін арттырудың маңыздылығы қарастырылған. Білім беруді цифрландыру, соның ішінде болашақ педагог мамандардың цифрлық құзыреттіліктерін қалыптастыру мәселесі өзекті болып отыр. Заман талабына сай биология пәнінің ақпараттық базасы күннен-күнге кеңеюде. Мақала биологияны соның ішінде зоологияны оқу кезеңінде жаңа ақпараттық жүйелер мен цифрлық порталдарды пайдалана отырып, «Зоология» пәнінің мысалында болашақ биология мұғалімдерін дайындау, цифрлық трансформация арқылы білім алушыларды оқыту мен оқыту үдерісінде цифрлық құзыреттілікті қалыптастыруға және білім беруді цифрландыру мәселесін тереңірек түсінуге ықпал етеді. Мақалада оқытушыларға, білім алушыларға және зерттеушілерге биология пәнінде цифрлық технологияларды қолдану жайлы тиімді мәліметтер ұсынылады.  

Кілт сөздер: цифрлық құзыреттілік, цифрлық сауаттылық, ақпараттық мәдениет, ақпараттық-коммуникациялық технологиялар.

Цифрлық трансформациялау идеясын әлемдік тренд деуге болады. Цифрлық технологиялар көптеген елдердің экономикасын дамытуда маңызды рөлге ие. ХХІ ғасыр - ақпараттандыру ғасыры екені белгілі. Ақпараттандыру технологиясы дамыған заманда мемлекетіміздің болашағы - жас ұрпаққа заман талабына сай білім беріп, жан-жақты дамуына ықпал ету оқытушымен шығармашылық ізденісті, үлкен сұранысты талап етеді. Компьютер және ақпараттық технологиялар арқылы жасалып жатқан оқыту процесі білім алушының жаңаша ойлау қабілетін қалыптастырып, оларды жүйелік байланыстар мен заңдылықтарды табуға итеріп, нәтижесінде - өздерінің кәсіби потенциалдарының қалыптасуына жол ашады. Бүгінгі таңдағы ақпараттық қоғам аймағындағы білім алшылардың ойлау қабілетін қалыптастыратын және компьютерлік оқыту ісін дамытатын жалпы заңдылықтардан тарайды.

 Ақпарат пен білім рөлінің өсуі, коммуникациялық құрал-жабдықтардың көз ілеспес жылдамдықпен жетілуі, желілік құрылымдардың дамуы - қоғамның ақпараттық әлемге енуінің көрінісі деп есептеймін. Қазіргі таңда сапалы білімді меңгерту үшін оқытушылардың қызығушылығы мен шығармашылық белсенділігін арттыру қажет. Оқытудың цифрлық коммуникациялық технологияларын енгізу және сол арқылы сапалы білім беру университетіміздің басты міндеті болып табылады.

Цифрлық трансформация білім берудің барлық саласына, соның ішінде болашақ биология мұғалімдерін дайындауға да үлкен септігін тигізуде. Биологияны оқу контекстінде заманауи технологияларды қолдану оқу үдерісін айтарлықтай байытып, білім алушылардың материалды түсінуін жақсартуға мүмкіндік береді.

Цифрлық білім беру, биологияны оқытудың заманауи кілті болып табылады. Цифрлық трансформация зоологияны оқыту және болашақ мұғалімдерді дайындау үшін жаңа мүмкіндіктер ашады. Заманауи технологияларды қолдану білім алыушылардың дайындық деңгейін арттыруға және оқу үдерісін қызықты әрі тиімді етуге мүмкіндік береді. Болашақ мұғалімдерді оқыту әдістемесі тек теориялық дайындықты ғана емес, сонымен қатар сандық құралдармен жұмыс істеудің практикалық дағдыларын қамтуы керек, осылайша түлектер педагогикалық тәжірибеде оқытудың соңғы әдістерін қолдануға дайын болуы керек.

Цифрлық трансформация биологияны оқытуға елеулі өзгерістер енгізіп, оқу процесін интерактивті, қолжетімді және тиімді етуде. Сандық түрлендірудің биологияны оқытуға әсер етуінің кейбір тәсілдеріне мыналар жатады:

1. Цифрлық ресурстарды пайдалану: Оқытушылар оқу материалдарын толықтыру және оқу тәжірибесін байыту үшін веб-сайттар, интерактивті қосымшалар, бейне оқулықтар және онлайн дәрістер сияқты сандық ресурстардың әртүрлі түрлерін пайдалана алады.

2. Виртуалды зертханалар: Заманауи бағдарламалық қамтамасыз ету мен веб-платформалар білім алушылараға зертханада физикалық қатысудың қажетінсіз эксперименттер жүргізе алатын, биологиялық процестерді зерттей алатын және материалдармен өзара әрекеттесетін виртуалды зертханаларды құруға мүмкіндік береді.