Қытай мәдениетіне кіріспе

Қытай мәдениетіне кіріспе

Тақырыпқа жалпы тоқталмай тұрып, мен мәдениет жайлы өз түсінігімді айтып өтуді жөн санадым.

Мәдениет - адамзат әлемі. Әл-Фараби адам баласын "хайуани мадани", яғни, адамды мәдениетті жан деп айтқан екен. Дәл осыдан біз мәдениет пен адам бір-бірінің ажырамас бөлігі екендігін білеміз. Мәдениет дегеніміз белгілі бір халықтың қол жеткізген табыстары мен шығармашылығының жиынтығы, әр ұлттың өзіндік ерекшеліктерінің көрінісі.

Қытай Халық Республикасы - ең көне, тарихы терең елдердің бірі.  Оның өркениеті 5000 жылдан көп уақытты қамтиды.  

Қытай елінің мәдениетінің өте қызықты, әрі ерекше екендігін осыдан да білуімізге болады. Қазіргі уақытта Қытай мәдениеті өте танымал, әрі бүкіл әлемге кең қанат жайды деп айтса, артық болмас.

Қытай- әлемдік өркениеттің маңызды бөлігі. Тарихи, сәулеттік, мәдени орындардың алтын сандығы. Қытай мәдениетінің маңызды бөлігі ретінде, біз тарихи ескерткіштерді айтсақ болады. Қазіргі уақытта Қытай ЮНЕСКО мен бірлесе отырып 119 табиғи аймақты өз қорғауына алды.

Мәдениеттің ажырамас бөлігі - өнер.

Қытай өнерінің салалары сан алауан.

Қытай мәдениеті салт-дәстүрлерді, мерекелерді, музыканы, биді, кескіндеме, бейнелеу, әдебиет, сәндік қолданбалы, киім және тағы басқа онер салаларын қамтиды. Солардың ішінде қытай жазуы ерекше орын алады. Қытай жазуы ең көне жазулардың бірі. Алдымен Қытайда ағаш табақтарға жазды, содан кейін жібектен жасалған қағаздар пайда болды.

Қытай өнеріне, оның қалыптасуына тоқталып өтейік.

Орта ғасырлар Қытай тарихындағы барынша ұзақ мерзім ғана емес, бұл елдің рухани деңгейінің мүмкіндігінше көтерілген тұсы. Аса үлкен калалар мен зәулім сарайлардың, бақтар мен храмдар, яғни көптеген құрылыстардың гүлденген кезеңі болды. Бұл уақытта новелла, роман секілді әдеби шығармалардың жаңа түрі пайда болды. Поэзия мен проза, театр мен музыка, мүсін мен сәулетшілік, кескіндеме мен көптеген қолөнер түрлері дамудың биік сатысына жетті. Шығыс елдеріне қытай философтары мен ақындарын, өнер теоретиктерін кеңінен таныстыруға мүмкіндік берген кітап басу өнері қалыптасты. Қытайда кітап басудың басталуымен әдебиет пен ғылыми білімнің дамуында айтарлықтай даму болды. Тарих пен археологияның түрлі салаларында көптеген еңбектер жарық көреді, бұл қытайлықтардың өз тарихына деген үлкен қызығушылығын көрсетеді. Кітап басып шығарудың кең таралуы халық шығармашылығы туындыларының пайда болуына ықпал етеді.