Қазақстан Республикасындағы кәсіпкерлік қызметті мемлекеттік қолдау және реттеудегі мәселелер мен оларды шешу жолдары

КІРІСПЕ

Қазіргі таңда кәсіпкерлік  қызметті дамыту, реттеу, қолдау мемлекеттік саясаттың басым бағыттарының бірі болып табылады. Ел басшылығы ол істі табысты жүзеге асырудың мемлекеттің одан әрі экономикалық және саяси дамуын айқындайтынын жақсы түсінеді. Атап айтқанда, Қазақстан Республикасы Президентінің 2012 жылғы 14 желтоқсан  айындағы  «Қазақстан-2050» стратегиясы – қалыптасқан мемлекеттің жаңа саяси бағыты атты Қазақстан халқына Жолдауында атап өтілгендей шағын және орта бизнеске қолдау көрсетудің жүйелі іс-қимылдары баяндала отырып, кәсіпкерлік қызметті одан әрі нығайтуға айрықша көңіл бөлінген [3] .

Курстық жұмыстың тақырып өзектілігі шағын және орта кәсіпкерлікті дамытудың пайдасы, мемлекетімізге алып келер үлесі орасан зор екендігін көрсету.  Дәл осы кәсіпкерлік қызмет түрлерін дамытпай, қолдау көрсетпей, реттеу шараларын жүргізбей еліміздің экономикасын жандандыру, халқымыздың әлеуметтік хал-ахуалын көтеру мүмкін емес. Жұмыссыздықты жоюда, жалақы мен зейнетақыны уақытылы төлеуде, нарықты халыққа қажетті тауарлармен қанағаттандыруда, жеке өндірушілердің монополиясын шектеуде, депрессияны бастан кешіріп отырған жекелеген аудандарды қалпына келтіруде  шағын және орта бизнес шешуші фактор. Қазақстанда шағын және орта кәсіпкерлік қызметті дамытуға байланысты шаралар Елбасы Н.Назарбаевтың 1997 жылы 6 наурызда қабылдаған «Шағын және орта кәсіпкерлікке мемлекет тарапынан қолдау көрсетуді жеделдету шаралары» деген қаулысынан басталды. Одан кейін «Шағын кәсіпкерлікті мемлекеттік қолдау туралы», «Жеке кәсіпкерлік туралы» Заңдар қабылданды. Шағын және орта кәсіпкерлікке қолайлы жағдайлар жасау үшін, қаржылай және ақпараттық қамтамасыз  етуді жетілдіру мақсатында  Елбасы «Қазақстан Республикасында кәсіпкерлікті қолдау мен дамытудың басымдықтары мен аймақтық бағдарламалары туралы» жарлық шығарды. Еліміз тәуелсіздік алғаннан бері әрбір жыл сайын шағын және орта кәспкерлікті дамытуда әртүрлі шаралар үздіксіз жүргізілуде.  Әрбір жыл сайынғы жолдауында Елбасымыз  шағын және орта кәсіпкерлікті дамытудың жаңа тәсілдерін ұсынып келеді. Мемлекет басшысының биылғы 2017 жылғы 31-қаңтардағы  «Қазақстанның үшінші жаңғыруы: жаһандық бәсекеге қабілеттілік» атты жолдауындада шағын және орта кәсіпкерлік қызметке айрықша назар бөлінгенін анықтай аламыз [4].