"Негиздөөчү" тасмасынын анализи

«Негиздөөчү» тасмасынын анализи

«Негиздөөчү» тасмасы дүйнөдөгү эң ири тез тамактануу тармактарынын бири болгон McDonald’s компаниясынын түзүлүү тарыхын баяндаган биографиялык драма. Тасманын башкы каарманы – Рэй Крок, ал кичинекей үй-бүлөлүк ресторанды глобалдык корпорацияга айландырган адам.

Тасма бою көрүүчү Рэй Кроктун жеке трансформациясын байкайт: ашкана миксерлерин саткан ийгиликсиз сатуучудан дүйнөлүк компаниянын башчылыгына чейин. Окуя Кроктун Макдональд бир туугандардын рестораны жөнүндө кокусунан билип калышы менен башталат. Бул ресторан жогорку тейлөө ылдамдыгы, так уюштурулган өндүрүш системасы жана кардарларга болгон өзгөчө мамилеси менен айырмаланат. Крок алардын концепциясынын потенциалын түшүнүп, бизнести франчайзинг аркылуу кеңейтүүнү сунуштайт. Бирок тармак кеңейген сайын, анын менен бир туугандардын ортосунда иш жүргүзүүдөгү ой айырмачылыктар көбөйөт. Акырында, Рэй Крок компаниянын толук көзөмөлүн өзүнө алып, бренддин укуктарын сатып алып, анын расмий негиздөөчүсү болуп калат.

Сюжеттин өнүгүшүнө таасир эткен окуя

«Негиздөөчү» тасмасындагы эң маанилүү жана бурулуш учур – Рэй Кроктун McDonald’s бизнесинин чыныгы баалуулугу тез тамактануу системасында эмес, ресторандар жайгашкан кыймылсыз мүлктө экенин түшүнүшү.

Буга чейин Крок тармакты кеңейтип жаткан, бирок франчайзилердин стандарттарына түздөн-түз таасир эте албай, туруктуу киреше таппай келген. Бул абал анын финансылык абалына терс таасирин тийгизип жаткан. Финансылык кеңешчи Гарри Соннеборн менен жолугушкандан кийин, ал жаңы стратегияны сунуштайт: компания ресторандар курулган жерлерге ээлик кылса, бардык өнөктөштөргө таасир эте алат жана финансылык туруктуулукту камсыз кылат. Бул бизнес моделин түп-тамырынан өзгөртүп, Крокко McDonald’s тармагынын толук көзөмөлүн берет. Бул учурдан тартып, тасма корпоративдик драманын мүнөзүн алып, моралдык принциптер менен бизнес идея карама каршы турат.

Бул бурулуш учурдагы маанилүү чындыкты баса белгилейт: заманбап бизнесте бийлик продуктту түзгөндөргө эмес, ресурстарды көзөмөлдөгөндөргө таандык. Эки баалуулук системасынын кагылышуусу орун алат: бир жагында – максаттуу жана чечкиндүү Крок, максатына жетүү үчүн келишимдерди бузууга даяр; экинчи жагында – моралдык нормаларды карманган, масштабга эмес, сапатка көңүл бурган Макдональд бир туугандар. Кроктун өзү да олуттуу өзгөрүүлөргө ээ болот: башында ал моралдык принциптерди, урмат-сыйды жана өнөктөштүккө умтулуусун көрсөтсө, кийин келишимдерди бузуп, компанияны анын жаратуучуларынан тартып алат. Фильмде эки мүнөздүн кагылышы чагылдырылат: максатка умтулган, чечкиндүү жана агрессивдүү – жана жумшак мүнөздүү, боорукер, кирешеден көрө адамдык баалуулуктарды жогору койгон. Акырында атаандаштыкка негизделген капиталисттик дүйнөдө күчтүүрөөк тарап жеңип, жаратуучулар эч нерсесиз калат