Азнаямленчая экскурсія па Астравецкаму раёну

ЗМЕСТ

УВОДЗІНЫ        3

УСТУП        4

АЗНАЯМЛЕНЧАЯ ЭКСКУРСІЯ        5

Астравец        5

Кумжа        5

Вілія        6

Вёска Дубок        7

Сарачанскія азёры        7

Дуга Струвэ        8

Курганы        8

Лясная гаспадарка        9

Нацыянальнасці        9

Генацыд        10

Іосіф Гашкевіч        11

Святыні        12

ЗАКЛЮЧЭННЕ        17

ДАДАТАК        18

УВОДЗІНЫ

Кожнаму з нас хоць раз у жыцці даводзілася ўпершыню трапіць у пэўны населены пункт, раён, вобласць ці краіну. Першае пытанне, якое адразу ўзнікае ў думках: “Што славутае і цікавае знаходзіцца ў гэтым месцы? Чым багата гісторыя гэтай мясцовасці?” І калі вас сустракае чалавек, які валодае дакладнай інфармацыяй, ты аўтаматычна з вялізным задавальненнем паглыбляешся ў гэтую неабсяжную і непаўторную гісторыю, якая насычана звесткамі разнастайных накірункаў: архітэктурныя каштоўнасці, помнікі прыроды, турыстычныя маршруты, знакамітыя людзі і г.д.

Астравеччына ў дадзеным накірунку, канешне, не з’яўляецца выключэннем. Наша маленькая Швейцарыя заўсёды гасціна прымае кожнага турыста, не пакідае раўнадушным ніводнага наведвальніка.

Мэтай дадзенай азнаямленчай экскурсіі з’яўляецца экспрэс-знаёмства з горадам Астравец і яго раёнам за кароткі прамежак часу.

Сфера выкарыстання – сустрэча гасцей з іншых раёнаў, абласцей і краін.

Задачы экскурсіі:

- садзейнічаць абуджэнню інтарэсу да культурна-гістарычнай спадчыны і выхаванню беражлівых адносін да яе;

- садзейнічаць выхаванню нацыянальнай самасвядомасці;

- на прыкладзе гістарычных, архітэктурных помнікаў, літаратурных, прыродазнаўчых і іншых аб’ектаў даць уяўленне аб некаторых этапах гісторыі Беларусі, яе асобных населеных пунктаў;

- пазнаёміць са славутымі мясцінамі Астравеччыны;

- пазнаёміць з біяграфіямі знакамітых людзей, жыццё якіх звязана з мясцінамі Астравеччыны.

УСТУП

- Вітаем вас, паважаныя госці! Мы рады сустракаць вас на нашай непаўторнай Астравецкай зямлі!

- Адкажыце мне, калі ласка, якія ў вас узнікаюць словы-асацыяцыі, калі вы чуеце назву “Астравец” або выраз “Астравецкі раён”?

- Выдатна. Дзякуй за вашы адказы! Да некаторых з гэтых слоў-асацыяцый мы з вамі звернемся падчас нашага падарожжа.

- А ці чулі вы такі выраз: “Астравец – гэта свету канец”?

- Чулі/Не чулі. І гэта вельмі добра. Падчас нашага з вамі маршруту мы дакажам, што гэты выраз з’яўляецца толькі міфам і не больш таго.

Маленькі астравок маёй зямлі –

Зялёны Астравец над срэбнай Лошай,

Такі прытульны і такі харошы,

Як сонца, бор і родныя палі.

- Менавіта з гэтых радкоў Уладзіміра Караткевіча мне хочацца пачаць нашу з вамі размову-знаёмства.

АЗНАЯМЛЕНЧАЯ ЭКСКУРСІЯ

Астравец

- Сёння вам, паважаныя госці, пашчасціла наведаць адзін з самых маладых і сучасных гарадоў нашай Беларусі. Чаму так? Бо афіцыйна статус горада мы атрымалі ў 2012 годзе. І з вялікім гонарам мы кажам, што, так, гэта наш малады і сучасны Астравец!

- Безумоўна, у кожнага населенага пункта і раёна ёсць свая багатая гісторыя, непаўторныя фаўна і флора. Астравеччына ў гэтых накірунках не стала выключэннем.

- Вось мы з вамі выязджаем з Астраўца, горада, які ўпершыню ўзгадваецца ў 1468 годзе дзякуючы роду Гаштольдаў.

- Давайце ўзгадаем з вамі тэму “Словаўтварэнне”. Як вы лічыце, ад якога слова паходзіць назва?

- Так, канешне. Калі звярнуцца да назвы горада, то яна мае славянскае паходжанне і паходзіць ад умацаванага вострава, які размешчаны на правым беразе ракі Лоша.

- Упэўнена, што вы звярнулі ўвагу на герб і сцяг нашага раёна. Давайце ўзгадаем, што вы там убачылі? Якія колеры пануюць?

- Так, дуб – сімвал моцы і мудрасці. Гэтых дрэў у нас вялікая колькасць, і ўсе яны пад строгай абаронай і аховай. Зялёны колер – сімвал бясконцасці лясоў і палёў, блакітны колер – бясконцасць рэкаў і азёр.